មេធាវី៦រូបនឹងជួយការពារក្ដីឲ្យមេធាវីដែលត្រូវអង្គភាពប្រឆាំងអំពើពុករលួយឃាត់ខ្លួន
02-June-2016 | ដោយ មែន កំសត់
ភ្នំពេញ ៖ គណៈមេធាវីនៃព្រះរាជាណាចក្រកម្ពុជា បានសម្រេចចាត់មេធាវីចំនួន៦រូបដើម្បីជួយការពារផ្នែកច្បាប់ជូនលោក ពេជ រតនា ដែលត្រូវបានអង្គភាពប្រឆាំងអំពើពុករលួយ ឃាត់ខ្លួននៅល្ងាចថ្ងៃទី៣១ ខែឧសភា ពាក់ព័ន្ធនឹងអំពើពុករលួយ។
មេធាវីទាំង៦រូប ដែលនឹងជួយការពារក្ដីឱ្យមេធាវី ពេជ រតនា រួមមាន លោក សាំង វណ្ណៈ, លោក អ៊ីវ ប៉ូលី, លោក ជូ ចាន់ធីរ៉ា, លោក ជា ហុងរី, អ្នកស្រី សៅ កញ្ញា និងលោក ឈី សម្បត្តិ។ មេធាវីទាំង ៦រូបនេះសុទ្ធសឹងតែជាសមាជិកក្រុមប្រឹក្សាគណៈមេធាវីនៃ ព្រះរាជាណាចក្រកម្ពុជា។
ប្រធានគណៈមេធាវី លោក ប៊ុន ហុន បានថ្លែងប្រាប់វិទ្យុវិទ្យុក្នុងស្រុកមួយ នៅរសៀលថ្ងៃទី១ ខែមិថុនា ថា មេធាវីទាំង ៦រូបនេះ ស្ម័គ្រចិត្តជួយការពារក្ដីឱ្យលោក ពេជ រតនា ដោយឈរលើគោលការណ៍ស្ម័គ្រចិត្ត ត្បិតលោក ពេជ រតនា ជាមិត្តរួមអាជីពនិងជាសមាជិកគណៈមេធាវីដូចគ្នា។
លោកបាន មានប្រសាសន៍ថា “ពួកគាត់ទាំង ៦នាក់ហ្នឹង គឺគាត់ទៅជួយការពារតាមផ្លូវច្បាប់ មិនមែនថាយកសកម្មភាពណាខុសច្បាប់ទៅធ្វើបាននោះទេ ព្រោះពួកគាត់សុទ្ធតែជាមេធាវីទាំងអស់គ្នា។អ៊ីចឹងគាត់គិតអំពី ច្បាប់ជាមូលដ្ឋាននៅក្នុងការការពារជួយដល់សហភាតា”។
លោក ប៊ុន ហុន បញ្ជាក់ទៀតថា គណៈមេធាវីក៏កំពុងទាក់ទងជាមួយអង្គភាពប្រឆាំងអំពើពុករលួយដើម្បីស្នើ សុំឲ្យរូបលោក និងមេធាវីទាំង៦រូប អាចចូលជួបសួរសុខទុក្ខដោយផ្ទាល់ជាមួយលោក ពេជ រតនា ក្រោយផុតរយៈពេល២៤ម៉ោងនៃការឃាត់ខ្លួន៕
ចំនួនអ្នកទស្សនា
- ថ្ងៃនេះ1041
- ម្សិលមិញ2931
- សប្តាហ៍នេះ13231
- ខែនេះ1041
- ឆ្នាំនេះ984261
- សរុប20211707